Vahti vash registripe e populaciako lugargyola ji pe 31 avgusti vash serbyuno komuniteti
Palo kedipe e Konsultatitvune Komitetesko vash Komunitetya, adikerdo pe 26 yuni 2025, kote o Konsileske jene, reprezentya e serbyune komunitetesko, mothavde o darakeripe vash pezulipe e pherune pokipyengo vash qhavore kotar e Ministria e Financiengi, pe 4 yuli, e iniciativa e Presidentako, ry. Vjosa Osmani Sadriu, reprezenta e Presidentake kabinetesko ano Konsili, ry. Donika Kadaj, khetane e Sekretareya e Konsilesko ry. Nafiye Gaş, adikerde kedipe e Sherune shefeya e Kosovake Statistikenga Agenciako, r. Avni Kastrati, phanglo akale puqipeya.
Vash te sigurinen o registripe e sakole dizunesko, Kosovaki Agencia vash Statistike shrdingya pe vahti yekh godinipeske vazdipeski kampanya pe serbyuni qhib thay kergya maksimaluno tentipe vash te inkurainen o kotorleipe e serbyune komunitetesko ano registripe. Sar alternativa, dendilo shaipe vash registripe ano komunalune ofisya e Agenciako vash Statistike, sar ano vrlorig, ayekha vi ano yugi e thanesko. Pashe akaleske, ni odothe o jene e serbyune komunitetesko na registrisale, na figurindoy ano detalya e rezidentune thanutnengo.
Vash te iklon ano azhutipe e dizunenge e serbyune komunitetesko, ini soske o Krisi anglodikhlarela sankcia vash refuzipe e registripesko, Agencia vash Statistike dela shaipe kay ji pe 31 avgusti 2025, dizune te nakhen ano sheurno ofisi e Kosovaka Agenciako vash Statistike ani Prishtina, ano Ofisi vash registripe, thay te registringyon palo odova ani baza e detalyengi.
Vash suskesuno registripe, jene e serbyune komunitetesko musay te nakhen personalune e familiake jenencar, te theren peya o personalune dokumentya, yekh mothavipe e beshipeske thanesko (elektrikaki, payneski vay taksengi faktura), ini vash qhavore, pasaporta vay bianipeski certifikata.
Vash te sigurinen kay o procesi e registripesko vash serbyuno komunitei ka agorinel pe vahti thay bizo may dur komplikipya, sito musayutno kay, khetane e mashkarthemutne partnerencar thay civiluno malipe te realizingyol yekh godinipeske vazdipeski kampanya vash o serbyuno komuniteti.
Sekretariati, khetane e jenencar e Konsilesko kotar serbyuno komuniteti, ka informinel o civiluno malipe kotar o srbyuno komuniteti, koya musay te lel aktivuni rola ani akaya kampanya.
Sar si pe r. Kastrati, sensibilizipe e populaciako thay informipeske kampanye siton but vasne, may buderi kana lelape pe dikhipe kay o problem e na-pokipesko e pherune pokipyengo vash qhavore shay te buhlol ini ano na-pokipe e penziengo vash odola dizune kay na lele kotor ano registripe thay kay na figurinena ani baza e detalyengi ani Kosovaki Agencia vash Statistike.
